21 Одолэ времёстыр Иисусо лыя тэ ракирэл ясно Пэскирэ сыклякирдэнгэ, со Ёв
должен тэ джял дро Иерусалимо и тэ хал барэ мэньки патывалэ пхурэндыр,
барыдырэ рашандыр и лылваритконэндыр, и тэ явэл умардо и прэ трито дывэс тэ
уштэл мулэндыр. 22 Тэдэ Пётро откхардя Лэс и лыя тэ отракирэл Лэс Лэскирэ
лавэндыр и ракирдя: «Мэ ракхэл Дэвэл, Рай! Тэ на кэрэлпэ Туса адякэ!». 23 Ёв жэ
порисия и пхэндя Пётроскэ: «Отоджя мандыр, Сатано! Ту кэрэспэ ваш Мангэ барэса,
прэ савэстэ Мэ давпэ71
, пал дова со ту думинэс нанэ пало Дэвлытко, а пало
манушытко».
24 Тэдэ Иисусо пхэндя Пэскирэ сыклякирдэнгэ: «Если кон камэл тэ джял пал Мандэ,
мэ отпхэнэлпэ пэстыр, мэ лэл пэскиро трушыл и мэ джял пал Мандэ слядоса. 25 Пал
дова со кон камэл тэ зракхэл пэскири душа, одова нашавэла ла, а кон нашавэла
пэскири душа пал Мандэ, одова латхэла ла. 26 Саво лачипэн манушэскэ, если ёв
лэла саро свэто пэскэ дро васта, нэ кэрла фуипэн пэскирэ душакэ? Или со дэла
мануш, соб тэ выкинэл пэскири душа? 27 Пал дова со явэла Манушытко Чяво дрэ
Пэскирэ Дадэскиро барипэн Пэскирэ Ангелэнца, и тэдэ Ёв дэла кажнонэскэ
миштыпэн пир лэскирэ рэнды. 28 Чячипэн ракирав тумэнгэ: машкир манушэндэ, кай
тэрдэ адай исы одолэ, савэ инкэ на мэрэна, сыр удыкхэна Манушытконэ Чявэс, кай
явэла дрэ Пэскиро Царство”.
17 Через шов дывэс Иисусо лыя Пётрос, Иаковос и Иоаннос, лэскирэ пшалэс, и
яндя лэн сарэтринэн прэ учи бэрга. 2 И Ёв парудыя Пэса ангил лэндэ: и Лэскиро муй
захачия, сыр о кхам, а Лэскиро уриабэн кэрдяпэ парно сыр свэто. 3 И, эна, ангил
лэндэ сыкадынэ Моисеё и Илья, савэ ракирдэ Лэса. 4 Тэдэ Пётро пхэндя Иисусоскэ
дро ответо: «Рай, куч амэнгэ тэ явас адай; если камэс, мэ чювава адай трин шатры:
ек ваш Тукэ, ек ваш Моисеёскэ и ек ваш Ильяскэ». 5 Кэдэ Ёв инкэ ракирдя, эна,
святло облако учякирдя лэн; и, эна, глос облакостыр пхэндя: «Ада Миро камло Чяво,
дрэ Савэстэ Миро радыма; кандэн Лэс». 6 И, кэдэ о сыклякирдэ ушундлэ адава,
пынэ прэ пхув тэлэ моса и дриван трашандынэ. 7 Нэ Иисусо подгыя, чиладя лэн и
пхэндя: «Уштэн и на трашан». 8 Кэдэ жэ ёнэ ґаздынэ пэскирэ якха, ни конэс на
удыкхнэ кроме екхэ Иисусостэ. 9 А сыр ёнэ змэкэнаспэ бэргатыр, Иисусо припхэндя
лэнгэ: «Ни конэскэ на ракирэн пал дова, со дыкхнэ, пока Манушытко Чяво на уштэла
мулэндыр».
10 И Лэскирэ сыклякирдэ спучнэ Лэстыр: «Со жэ лылваритка ракирэн, со англыдыр
должен тэ явэл Илья?» 11 О Иисусо пхэндя лэнгэ дро ответо: «Илья чячё должен тэ
явэл и тэ чювэл саро прэ пэскиро штэто. 12 Нэ ракирав тумэнгэ, со Илья ужэ явья, и
лэс на ґалынэ, а кэрдэ лэса, со камнэ, адякэ и Манушытко Чяво хала мэньки
лэндыр». 13 Тэдэ о сыклякирдэ полынэ, со Ёв ракирдя лэнгэ палэ Иоаностэ
Болдарестэ.
14 И, кэдэ ёнэ явнэ ко мануша, кэ Ёв подгыя ек мануш и тэрдыя ангил Лэстэ про
чянга, 15 и пхэндя: «Рай, подорин мирэ чявэс; пал дова со ёв бэнгвалёл прэ кажно
нэво чён и дриван мэнчинэлпэ, ёв чястэс чюрдэлпэ то дрэ яг, то дро паны. 16 И мэ
яндём лэс кэ Тырэ сыклякирдэ, и ёнэ на сможындлэ тэ высастякирэл лэс». 17 О
71 Дык Мф. 11:6Иисусо жэ пхэндя дро ответо: «Бипатябнытко и розмэкно поколениё, кицык мангэ тэ
явав тумэнца? Кицык мангэ тэ пирилыджяв тумэн? Яндэн лэс кэ Мэ адарик». 18 И
Иисусо припхэндя бэнгэскэ, и бэнг выгыя лэстыр; и о раклоро высастыя дрэ одоя жэ
кунь. 19 Тэдэ о сыклякирдэ подгынэ ко Иисусо екджинэ и пхэндлэ:
«Соскэ амэ на можындям тэ истрадэл лэс?» 20 О Иисусо жэ пхэндя лэнгэ дро
ответо: «Пал дова, со тумэ на патяндынэ. Чячипэн ракирав тумэнгэ: если тумэндэ
явэла патябэн сыр горчично зёрно и тумэ пхэнэна адалэ бэргакэ: «Пириджя адацыр
одорик, и ей пириджяла, и ваш тумэнгэ на явэла ничи, со тумэ на сможынэна». 21
Адава жэ поколениё истрадэлпэ только, кэдэ мангэлпэ и постинэлпэ.
22 Кэдэ ёнэ исыс дрэ Галилея, Иисусо пхэндя лэнгэ: «Манушытко Чяво явэла отдыно
дро васта манушэнгэ, 23 и ёнэ умарна Лэс, и прэ трито дывэс Ёв уштэла мулэндыр».
И ёнэ дриван смэкнэ о шэро.
24 Кэдэ жэ ёнэ явнэ дро Капернаумо, подгынэ ко Пётро одолэ, кай скэдэнас о налого
дро дуй драхмы72
, и пхэндлэ: «Тумаро сыклякирибнарё плэскирэл о налого дро дуй
драхмы?» 25 Ёв пхэндя: «Нэ». И, кэдэ ёв загыя дро кхэр, Иисусо англыдыр лэстыр
пхэндя лэскэ: «Сыр ту думинэс, Симоно? Конэстыр пхувьякирэ цари скэдэн о
пошлины и о подати: пэскирэ чявэндыр или манушэндыр, кай явнэ ваврэ
пхувьендыр?» 26 О Пётро ракирэл Лэскэ: «Манушэндыр, кай явнэ ваврэ
пхувьендыр», о Иисусо пхэндя лэскэ: «Тэдэ чявэ не должны тэ плэскирэн о налоги,
27 нэ, соб амэнгэ тэ на холякирас лэн, джя ко морё, и зачюрдэ вэнка, и лэ первонэ
мачес, савэс ухтылэса; и, кэдэ откэрэса лэскэ муй, ту латхэса о статиро73
; лэ лэс и
отдэ лэнгэ пал Мандэ и пал пэстэ».
18 Дрэ одоя кунь подгынэ о сыклякирдэ ко Иисусо и пхэндлэ: «Кон жэ о барыдыр
дрэ Болыбнытко Царство?» 2 И Иисусо подкхардя кэ пэ чяврэс и чюдя лэс машкир
лэндэ 3 и пхэндя: «Чячипэн ракирав тумэнгэ: если на парудёна и на кэрнапэ сыр
чявэ, на заджяна дрэ Болыбнытко Царство. 4 Адякэ, кон улэла пэс и явэла сыр
адава чяво, одова и о барыдыр дрэ Болыбнытко Царство. 5 И кон прилэла екхэс
адасавэс чявэс дрэ Миро лав, одова прилэл Ман. 6 А кон слыджяла ко грэхо екхэс
адалэ тыкнэндыр, савэ патян дрэ Мандэ, одолэскэ явэлас бы фэдыр, если бы лэскэ
прэ мэн ублавэнас мельнично бар и тасадькирнас лэс дро морё, кай глубокима.
7 Хасибэн свэтоскэ пал саро одова, со слыджял лэс ко грэхо, чячё саро одова, со
слыджял манушэн ко грэхо должно тэ явэл; нэ хасибэн одолэ манушэскэ, саво кокоро
слыджял ко грэхо! 8 Если жэ тыро вас или тыри ґэрой слыджял тут ко грэхо, отчингир
лэн и чюрдэ пэстыр: фэдыр тукэ тэ заджял дро джиипэн увечнонэса или лангалэса,
одолэстыр сыр дуе вастэнца или дуе ґэрэнца тэ явэл чюрдыно дрэ яг, кай хачёл
вэкэнца. 9 И если тыри як слыджял тут, вырискир ла и чюрдэ пэстыр: фэдыр тукэ
екхэ якхаса тэ заджял дро джиипэн, одолэстыр сыр дуе якхэнца тэ явэл чюрдыно дрэ
ягалы геена. 10 Дыкхэн, на отлыджянпэ ни кэ ек адалэ тыкнэндыр адя, со ёнэ ничи
нанэ мол; пал дова со, ракирав тумэнгэ, со лэнгирэ ангелы про болыбэн всегда
дыкхэн Мирэ Дадэскиро муй, Кай про болыбэн. 11 Пал дова со Манушытко Чяво
явья тэ латхэл и тэ зракхэл одова, со хасия. 12 Сыр тумэ думинэн? Если савэ-
нибудь манушэстэ явэлас шэл бакря, и ек лэндыр заблэндынэласпэ, то разве на
ачькирла ёв иньядэша тэ инья дро бэрги и на джяла тэ родэл одоля, кай
заблэндындяпэ? 13 И если лэскэ удэлапэ тэ латхэл ла, то, чячё ракирав тумэнгэ, ёв
лэла тэ радынэлпэ лакэ бутыр одолэ иньядэша тэ иньендыр, со на заблэндындлэпэ.
72 Драхма ада рупови ґасприн дрэ пураны Греция.
73 Ек рупово статиро дрэ пураны Греция - ада штар руповэ драхмы. 14 Адякэ и тумаро Дад, Кай про болыбэн, на камэл, соб тэ хасёл ек адалэ
тыкнэндыр.
15 Если жэ тыро пшал кэрла против тутэ грэхо, джя и пхэн лэскэ як прэ як, дрэ со
лэскири банг машкир тутэ и лэстэ; если ёв тут кандэла, то тутэ палэ исы пшал. 16
Если жэ ёв на кандэла тут, то лэ пэса инкэ екхэс или дуен, соб кажно лав тэ
допхэнэлпэ дуе или тринэ манушэнца, кай исыс пашыл. 17 Если жэ на кандэла лэн,
пхэн кхангирьякэ, а если и кхангири на кандэла, то мэ явэл ёв ваш тукэ сыр мануш
ваврэ пхувьендыр и налогэнгиро скэдыбнарё.
18 Чячипэн ракирав тумэнгэ: саро, со тумэ спхандэна прэ пхув, явэла спхандло про
болыбэн; и саро, со тумэ роспхандэна прэ пхув, явэла роспхандло про болыбэн. 19
Палэ ракирав тумэнгэ: если дуйджинэ тумэндыр доракирнапэ ек екхэса прэ пхув, то
одова, пал со ёнэ тэ на помангэн, Миро Дад, Кай про болыбэн, кэрла лэнгэ. 20 Пал
дова со кай дуйджинэ или тринджинэ скэдынэпэ дрэ Миро лав, одой Мэ сом машкир
лэндэ.
21 Тэдэ подгыя кэ Ёв Пётро и пхэндя: «Рай, кицык молы мэ должен тэ простинав
мирэ пшалэс, кай кэрэл о грэхо против мандэ? Ко эфта молы?» 22 О Иисусо ракирэл
лэскэ: «Ракирав тукэ: нанэ ко эфта, нэ ко эфтадэша тэ эфта молы.
23 Пал адава Болыбнытко Царство подджял прэ царёстэ, кай закамья тэ погинэлпэ
пэскирэ писхарьенца. 24 И кэдэ ёв лыя тэ гинэлпэ, кэ ёв яндлэ екхэ манушэс, кай
исыс банго лэскэ дэш бара таланты74
. 25 Нэ пал дова со лэскэ на исыс, соса тэ
выплэскирэл о длэнго, то лэскиро хулай припхэндя тэ бикнэл лэс, и лэскирэ ромня и
чявэн, и саро, со лэстэ исыс, и тэ выплэскирэл о длэнго. 26 Тэдэ адава писхарё пыя
про чянга, бандёлас лэскэ и ракирдя: «Поужакир набут, и мэ саро выплэскирава
тукэ». 27 Э царёскэ кэрдяпэ дор писхарёс, и ёв отмэкья лэс, и простиндя лэскэ о
длэнго. 28 Нэ адава писхарё, кэдэ выгыя, латхья авирэ писхарёс, кай исыс банго
лэскэ шэл динарии75
, и, кэдэ ёв ухтылдя лэс, лыя тэ тасавэл и ракирдя: "Отдэ мангэ
саро, со ту банго”. 29 Тэдэ одова писхарё пыя про чянга ангил лэстэ и умангэлас лэс
и ракирдя: "Поужакир набут, и мэ саро выплэскирава тукэ”. 30 Нэ ёв на закамья, а
гыя и чюдя лэс дро старибэн, пока одова на выплэскирла саро, со исыс банго. 31
Кэдэ ваврэ писхарья удыкхнэ, со кэрдяпэ, ёнэ дриван помэкнэ о шэро, и явнэ и
роспхэндлэ пэскирэ хуласкэ пал саро, со кэрдяпэ. 32 Тэдэ лэскиро хулай покхардя
одолэ писхарёс и ракирэл лэскэ: "Холямо писхарё, мэ простиндём тукэ саро тыро
длэнго, пал дова со ту умангэсас ман; 33 разве ту не должен был тэ подоринэс
пэскирэ джиндлэс, сыр и мэ подориндём тут?” 34 И лэскиро хулай загыя дро холя и
отдыя лэс старибнытконэ рангэ про мэньки, пока ёв на выплэскирла саро, со исыс
банго. 35 Адякэ и Миро Болыбнытко Дад кэрла тумэнца, если кажно тумэндыр на
простинэла илэстыр пэскирэ пшалэскэ лэскирэ грэхи».
19 Кэдэ Иисусо пириячья тэ ракирэл адалэ лава, то выгыя Галилеятыр и явья дрэ
Иудеякирэ пхувья пало Иордано. 2 Пал Лэстэ слядоса гынэ бут мануша, и Ёв
высастякирдя лэн одой.
3 И подгынэ кэ Ёв фарисеи и, соб тэ испытынэл Лэс, ракирдэ Лэскэ: «А можно пиро
Законо муршэскэ тэ розлыджялпэ ромняса, кэдэ ёв закамэла?» 4 Ёв жэ пхэндя лэнгэ
дро ответо: «Разве тумэ на гиндлэ, со Одова, Кон лэн кэрдя, англыдыр кэрдя муршэс
74 Таланто - ада исыс дриван барэ ловэ. Екхэ талантоскиро пхарипэн исыс 20 (биш)
килограммы совнакай или руп.
75 Динариё - рупови ґасприн дрэ пурано Римо; ек динариё исыс бутярескиро закэрибэн пало
ек бутитко дывэс.и джювля? 5 И пхэндя: "Пал адава мурш ачькирла дадэс и да и приячела кэ пэскири
ромны, и дуйджинэ кэрнапэ сыр екхэ манушэскирэ маса”? 6 Адя со лэн ужэ нанэ
дуйджинэ, нэ екхэ манушэскирэ маса. Адякэ, со Дэвэл кэрдя екхэса, одова мануш мэ
на розлыджял». 7 Ёнэ ракирэн Лэскэ: «Соскэ жэ Моисеё причиндя тэ дэл ромнякэ о
лыл ваш одова, соб тэ розлыджялпэ и тэ отмэкэл ла?» 8 Ёв ракирэл лэнгэ: «Моисеё
пал тумарэ холямэ илэ домэкья, соб тумэ тэ розлыджянпэ тумарэ ромненца, нэ
англыдыр адякэ на исыс. 9 Нэ Мэ ракирав тумэнгэ: кон розлыджялпэ пэскирэ
ромняса нанэ пал одова, со ей испарувэл и лэла авирья пало ром, одова испарувэл;
и кон лэла пэскэ ромня, сави розлыджияпэ, одова испарувэл».
10 Лэскирэ сыклякирдэ ракирэн Лэскэ: «Если адякэ чебинэ тэ отлыджялпэ муршэскэ
кэ пэскири ромны, то фэдыр тэ на женинэлпэ». 11 Ёв жэ пхэндя лэнгэ: «Нанэ сарэ
можынэн тэ прилэн Мирэ лава, нэ одолэ, конэскэ дыно. 12 Пал дова со исы мурша,
кай бияндынэ дакирэ пэрэстыр адасавэнца, со на можынэн тэ лэл пэскэ ромня; и исы
адасавэ, савэн обчиндлэ мануша; и исы адасавэ, кай отпхэнэнпэ тэ лэл пэскэ ромня
пал Болыбнытко Царство. Кон можынэл тэ прилэл адава, мэ прилэл адава».
13 Тэдэ исыс яндлэ кэ Ёв чявэ, соб Ёв тэ чювэл прэ лэндэ васта и тэ помангэлпэ, о
сыклякирдэ жэ на мэкэнас лэн. 14 Нэ Иисусо пхэндя: «Мэкэн чявэн и на тэрдён прэ
лэнгиро дром тэ явэн кэ Мэ, пал дова со адасавэнгиро Болыбнытко Царство». 15 И,
кэдэ Ёв чюдя прэ лэндэ васта, угыя одоцыр.
16 И, эна, кэ Ёв подгыя ек мануш и пхэндя Лэскэ: «Лачё Сыклякирибнарё, саво
лачипэн мангэ чеби тэ кэрав, соб мандэ тэ явэл вечно джиипэн?» 17 Ёв жэ пхэндя
лэскэ: «Со ту накхарэс Ман лачеса? Никон нанэ лачё, кроме екхэ Дэвлэстэ. Если жэ
камэс тэ заджяс дрэ вечно джиипэн, джив пиро Напхэныбэна». 18 Ёв ракирэл Лэскэ:
«Пир савэ?» О Иисусо жэ пхэндя: «На умар; на испарув; на чёр, на дэ хохано
допхэныбэн, 19 чюв патыв прэ дадэстэ и датэ; и: кам тырэ ближнёнэс, сыр кокоро
пэс». 20 Тэрно мануш ракирэл Лэскэ: «Саро адава мэ зракхьём мирэ тэрнэ
бэршэндыр; со инкэ мангэ на ухтылэл?» 21 О Иисусо пхэндя лэскэ: «Если камэс тэ
явэс бидошакиро, джя, бикин саро, со тутэ исы и роздэ чёрорэнгэ; и тутэ явэла
барвалыпэн про болыбэн; и яв и джя пал Мандэ слядоса76
». 22 Кэдэ жэ тэрно мануш
ушундя адава лав, то помэкья о шэро и угыя, пал дова со лэстэ исыс баро
миштыпэн. 23 О Иисусо жэ пхэндя Пэскирэ сыклякирдэнгэ: «Чячипэн ракирав
тумэнгэ: пхаро явэла барвалэскэ тэ заджял дрэ Болыбнытко Царство. 24 И инкэ
ракирав тумэнгэ: локхыдыр э верблюдоскэ тэ проджял через сувитко каноро, чем
барвалэскэ тэ заджял дрэ Дэвлэскиро Царство».
25 Кэдэ о сыклякирдэ ушундлэ адава, то дриван удивиндлэпэ и пхэндлэ: «Кон жэ
тэдэ можынэл тэ зракхэлпэ?» 26 А Иисусо подыкхья прэ лэндэ и пхэндя лэнгэ:
«Манушэнгэ ада нанэ пирэ зор, нэ Дэвлэстэ прэ саро исы зор».
