27 Тэдэ Пётро пхэндя Лэскэ дро ответо: «Эна, амэ ачькирдям саро и гыям пал Тутэ
слядоса; со жэ явэла амэнгэ?» 28 О Иисусо жэ пхэндя лэнгэ: «Чячипэн ракирав
тумэнгэ, со тумэ, кай гынэ пал Мандэ слядоса, дрэ нэво свэто, кэдэ бэшэла
Манушытко Чяво про троно дрэ Пэскиро барипэн, бэшэна и тумэ прэ дэшудуй троны
тэ сэндякирэн дэшудуй Израилёскирэ роды. 29 И кажно, кон ачькирла кхэра, или
пшалэн, или пхэнен, или дадэс, или да, или ромня, или чявэн, или фэлды пал Миро
лав, лэла шэлвар бутыр и лэскэ явэла дыно вечно джиипэн.
30 Нэ бут одолэ, савэ исыс англатунэ, явэна палатунэ, а палатунэ явэна англатунэ.
76 Дык Мф. 4:2020 Болыбнытко Царство подджял прэ кхэрэскирэ хуластэ, кай выгыя чють свэто тэ
налэл бутярьен дрэ пэскиро винограднико 2 и, кэдэ доракирдяпэ бутярьенца пиро ек
динариё пало дывэс, бичядя лэн дрэ пэскиро винограднико. 3 Кэдэ ёв выгыя дрэ
трито кунь, удыкхья авирэн, кай исыс тэрдэ прэ таргитко штэто бибутякиро, 4 и
пхэндя лэнгэ: "Джян и тумэ дрэ миро винограднико, и мэ дава тумэнгэ, кицык
приджялапэ”. И ёнэ гынэ. 5 Палэ, кэдэ ёв выгыя дрэ шовто и дрэ иньято кунь, кэрдя
одова жэ. 6 Кэдэ жэ ёв выгыя дрэ дэшуперво кунь, латхья авирэн, кай исыс тэрдэ
бибутякиро и ракирэл лэнгэ: "Со тумэ тэрдэ адай саро дывэс бибутякиро?” 7 Ёнэ
ракирэн лэскэ: "Амэн ни кон на лыя прэ буты”. Ёв ракирэл лэнгэ: "Джян и тумэ дрэ
миро винограднико, и кицык приджялапэ, мэ дава тумэнгэ”.
8 Кэдэ наячья бывэль, виноградникоскиро хулай пхэндя пэскирэ барыдырэ
писхарёскэ: "Кхар бутярьен и выплэскир лэнгэ лэнгиро закэрибэн, э последнёнэндыр
ко перва”. 9 И явнэ одолэ, кай кэрнас буты дэшупервонэ кунятыр, и кажно лэндыр
лыя пиро ек динариё. 10 Одолэ жэ, кай явнэ перва, подуминдлэ, со ёнэ лэна бутыр,
нэ и ёнэ лынэ пиро ек динариё. 11 И, кэдэ ёнэ лынэ закэрибэн, лынэ холенца тэ
выпхэнэн хуласкэ, 12 и ракирдэ: "Адалэ последня кэрдэ буты только ек кунь, и ту
подчюдян лэн кэ ямэ, кэ одолэ, кон саро дывэс пхарэс кэрлас буты дрэ адасаво
хачькирибэн!” 13 Ёв жэ пхэндя екхэскэ лэндыр дро ответо: "Друго, мэ на обджявпэ
туса фуй. Разве нанэ пало ек динариё ту доракирдянпэ манца? 14 Лэ пэскиро и джя.
Мэ жэ камам адалэ последнёнэнгэ тэ дав адакицык, кицык и тукэ. 15 Разве мэ нанэ
дро право тэ кэрав пэскирэса, сыр мэ камам? Или тыри як холямы одолэстыр, со мэ
сом лачё? 16 Адякэ палатунэ явэна англатунэ, и англатунэ - палатунэ, пал дова со
бут кон кхардо, нэ набут кон искэдыно”.
17 И, кэдэ Иисусо ґаздэласпэ дро Иерусалимо, отлыджия пиро дром дэшудуен
сыклякирдэн дрэ строна и пхэндя лэнгэ: 18 «Эна, амэ ґаздаспэ дро Иерусалимо, и
Манушытко Чяво явэла отдыно барыдырэ рашангэ и лылваритконэнгэ, и ёнэ
сэндякирна Лэс про мэрибэн. 19 И отдэна манушэнгэ ваврэ пхувьендыр, соб тэ
ґаздэн Лэс про сабэн, тэ марэн Лэс чюкняса и тэ казнякирэн Лэс про трушыл; и прэ
трито дывэс Ёв уштэла мулэндыр».
20 Тэдэ подгыя кэ Ёв Заведеёскирэ чявэнгири дай пэскирэ чявэнца, лыя тэ бандёл
Лэскэ и палсо-то Лэс тэ мангэл. 21 Ёв пхэндя лакэ: «Со ту камэс?» Ей ракирэл Лэскэ:
«Пхэн, соб адалэ дуй мирэ чявэ тэ бэшэн ек пир право вас Тутыр, а явир пир лево
дрэ Тыро Царство». 22 О Иисусо жэ пхэндя дро ответо: «На джинэн, со мангэн. Тумэ
можынэн тэ пьен тахтай, саво Мэ лава тэ пьяв, или тэ болэнпэ, сыр Мэ болавпэ?»
Ёнэ ракирэн Лэскэ: «Можынас». 23 И Ёв ракирэл лэнгэ: «Чячё, миро тахтай тумэ
лэна тэ пьен и сыр Мэ болавпэ, тумэ лэна тэ болэнпэ, нэ тэ бэшэл пир право вас
Мандыр и пир лево, нанэ Мангэ тэ дав, адалэ штэты одолэнгэ, конэскэ приготовиндя
лэн Миро Дад».
24 Кэдэ авирэ дэш сыклякирдэ ушундлэ адава, то холясынэ прэ дуе пшалэндэ. 25 О
Иисусо жэ подкхардя лэн кэ Пэ и пхэндя: «Тумэ джинэн, со свэтоскирэ правители
кэрдэпэ хуланца прэ лэндэ и о барэ рикирэн лэн дрэ пэскирэ васта, 26 нэ машкир
тумэндэ мэ на явэл адякэ, нэ если кон камэл тэ явэл машкир тумэндэ барыдырэса,
мэ явэл тумэнгэ писхарёса; 27 и кон камэл тэ явэл машкир тумэндэ первонэса, мэ
явэл тумэнгэ писхарёса; 28 пал дова со Манушытко Чяво явья нанэ ваш одова, соб
Лэскэ тэ служынэн, а соб тэ послужынэл и тэ отдэл Пэскири душа сыр выкиныбэн
пал бутэ манушэндэ».
29 И кэдэ ёнэ выджянас Иерихоностыр, пал Лэстэ слядоса джянас бут мануша. 30 И, эна, дуй корорэ исыс бэштэ пашо дром и, кэдэ ёнэ ушундлэ, со мамуй проджял
Иисусо, лынэ тэ годлэн: «Рай, Давидоскиро Чяво, подорин амэн!» 31 О мануша жэ
зачювэнас лэн тэ штылён, нэ ёнэ годлэнас инкэ зоралыдыр: «Рай, Давидоскиро
Чяво, подорин амэн!» 32 И Иисусо тэрдыя и подкхардя лэн и пхэндя: «Со тумэ
камэн, соб Мэ тэ кэрав тумэнгэ?» 33 Ёнэ ракирэн Лэскэ: «Рай, соб тэ откэрэнпэ
амарэ якха». 34 Э Иисусоскэ жэ кэрдяпэ дор лэн, и Ёв чиладя лэнгирэ якха; и адай
жэ лэнгирэ якха лынэ тэ дыкхэн и ёнэ гынэ пал Лэстэ слядоса.
21 И кэдэ ёнэ подъявнэ ко Иерусалимо и явнэ дрэ Виффагия, со прэ
Маслинэнгири бэрга, Иисусо бичядя дуе сыклякирдэн 2 и пхэндя лэнгэ: «Джян
дро гав, кай ангил тумэндэ; и екхатыр жэ латхэна припхандлэ ослица и ласа
ослёнкос; отпхандэн лэн и яндэн кэ Мэ. 3 И если кон пхэнэла тумэнгэ со-нибудь,
пхэнэн дро ответо: "Ёнэ чебинэ Раскэ”; и ёв адай жэ отдэла лэн тумэнгэ».
4 Саро жэ адава кэрдяпэ, соб тэ исджялпэ одова, со исыс пхэндло через
припхэныбнарестэ, кай ракирэл: 5 «Пхэнэн Сионоскирэ чякэ: "Эна, Тыро Царё джял
кэ ту ковлэилытко, бэшто прэ ослостэ и прэ ослёнкостэ, э ослицатыр, кай лыджял о
пхарипэна”».
6 О сыклякирдэ гынэ и кэрдэ адякэ, сыр напхэндя лэнгэ Иисусо: 7 яндлэ ослица и
осленкос и чюдэ прэ лэндэ пэскирэ уриабэна, и чюдэ Лэс. 8 Бут мануша росчювэнас
пэскиро уриабэн про дром, ваврэ счинэнас о ветки брэзэндыр и чювэнас лэн про
дром. 9 Мануша жэ, кай джянас англал и палал, дэнас лошалэ годлы: «Мангас Тут,
зарак77
Давидоскирэ Чявэс! Тэ явэл благословено Одова, Саво джял дрэ Раскиро
лав! Зарак лэс, мангас Тут, Кай дро учипэн!»
10 И кэдэ Ёв загыя дро Иерусалимо, саро форо оджидыя и ракирдя: «Кон ада?» 11
Мануша жэ ракирдэ: «Ада Иисусо, припхэныбнарё Назаретостыр, со дрэ Галилея!»
12 И Иисусо загыя дрэ Дэвлэскири кхангири, вытрадыя одоцыр сарэн, кон бикнэлас
и кинэлас дрэ кхангири и пиририскирдя одолэнгирэ скаминда, кон парувэлас о ловэ,
и одолэнгирэ скамейки, кон бикнэлас голубен, 13 и ракирдя лэнгэ: «Начиндло: "Миро
кхэр явэла накхардо кхэрэса, кай мангэнпэ”; а тумэ кэрдэ лэстыр о штэто, кай
скэдэнпэ розмарибнарья». 14 И подгынэ кэ Ёв дрэ кхангири корорэ и лангалэ, и Ёв
высастякирдя лэн.
15 Кэдэ жэ о барыдыр рашая и лылваритка удыкхнэ дивна рэнды, кай Ёв кэрлас, и
чявэн, кай дэнас годлы дрэ кхангири и ракирнас: «Мангас, зарак Давидоскирэ
Чявэс!» - росхолясынэ 16 и пхэндлэ Лэскэ: «Шунэс, со ёнэ ракирэн?» О Иисусо жэ
ракирэл лэнгэ «Нэ! Неужто тумэ ни кэдэ на гиндлэ: "Тыкнэ чяврэнгирэ и тыкнэ
масэнгирэ уштэндыр Ту кэрдян шарибэн?” 17 И, кэдэ ачькирдя лэн, выгыя форостыр
дрэ Вифания и ратькирдя одой.
18 Утроса жэ, кэдэ Ёв рисёлас дро форо, бокхалыя. 19 И, кэдэ Ёв удыкхья пашо
дром инжырно брэза, подгыя кэ ей, нэ на латхья прэ латэ ничи, кроме ек о патриня, и
ракирэл лакэ: «Мэ на явэл ни кэдэ бутыр прэ тутэ о мури». И инжырно брэза адай жэ
зашутия. 20 О сыклякирдэ, сыр удыкхнэ адава, дриван удивиндлэпэ и ракирдэ: «Сыр
ада екхатыр зашутия инжирно брэза?» 21 О Иисусо жэ пхэндя лэнгэ дро ответо:
«Чячипэн ракирав тумэнгэ: если тумэндэ явэла патябэн и тумэ на усомнинэнапэ,
кэрна нанэ только одова, со кэрдо инжирнонэ брэзаса, нэ и если пхэнэна адалэ
бэргакэ: "Ґаздэпэ и чюрдэпэ дро морё”, адя и явэла. 22 И саро, со тумэ помангэна
дро мангипэн патябнаса, явэла дыно тумэнгэ».
23 И кэдэ Ёв явья дрэ кхангири, о барыдыр рашая и патывалэ пхурэ подъявнэ кэ Ёв,
77 (лав дро лав) «Осанна!»кэдэ Ёв сыклякирлас, и пхэндлэ: «Савэ зорьяса Ту адава кэрэс? И кон дыя Тукэ
адасави зор?» 24 О Иисусо пхэндя лэнгэ дро ответо: «И Мэ спучява тумэндыр пал
кое-со; если тумэ пхэнэна Мангэ пал дова, то и Мэ пхэнава тумэнгэ, савэ зорьяса Мэ
адава кэрав. 25 О Иоанно болэлас манушэн, кацыр адава исыс? Болыбнастыр или
манушэндыр?» Ёнэ жэ россэндынэнас машкир пэстэ: «Если пхэнаса: "Болыбнастыр”,
то Ёв пхэнэла: "Соскэ жэ тумэ на патяндынэ лэскэ?” 26 А если пхэнаса:
"Манушэндыр”, то дараспэ манушэндыр, пал дова со сарэ гинэн Иоаннос палэ
припхэныбнарестэ». 27 И ёнэ пхэндлэ Иисусоскэ дро ответо: «На джинас». Тэдэ Ёв
пхэндя лэнгэ: «И Мэ на пхэнава тумэнгэ, савэ зорьяса Мэ адава кэрав».
28 А сыр тумэ думинэн? Екхэ манушэстэ исыс дуй чявэ; и ёв подгыя ко перво и
пхэндя: «Миро чяво, джя покэр буты дадывэс дрэ миро винограднико». 29 Нэ ёв
пхэндя дро ответо: «На джява», а тэнчя приґалыя пэскири банг и гыя. 30 И кэдэ ёв
подгыя кэ авир, ёв пхэндя одова жэ. Нэ адава пхэндя дро ответо: «Джява, миро дад»,
и на гыя. 31 Кон дуендыр кэрдя пир дадэскири воля». Ёнэ ракирэн Лэскэ: «Перво». О
Иисусо ракирэл лэнгэ: «Чячипэн ракирав тумэнгэ: налогэнгирэ скэдыбнарья и
биладжякунэ джювля англыдыр тумэндыр джян дрэ Дэвлэскиро Царство. 32 Пал
дова со Иоанно явья кэ тумэ и усыкавэлас чячюно дром, и тумэ на патяндынэ лэскэ,
а налогэнгирэ скэдыбнарья и биладжякунэ джювля патяндынэ лэскэ; тумэ жэ, хотя и
дыкхнэ адава, тэнчя на приґалынэ пэскирэ грэхи, соб тэ патял лэскэ.
33 Пошунэн авир примеро: исыс ек кхэрэскиро хулай, кай чюдя о винограднико,
облыджия лэс барьяса, выґанадя дрэ лэстэ ґанык, кай чюдя тасаибнытко бар тэ
вытасавэл о соко, чюдя ракхибнытко башня и, кэдэ здыя лэс гавитконэ бутярнэнгэ,
утрадыя дрэ вавир пхув. 34 Кэдэ жэ подгыя времё тэ скэдэл о мури, ёв бичядя
пэскирэ писхарьен ко гавитка бутярнэ, соб ёнэ тэ лэн лэскири муря. 35 И гавитка
бутярнэ, кэдэ ухтылдэ лэскирэ писхарьен, екхэс мардэ, авирэс умардэ, а тритонэс
помардэ барэнца. 36 Палэ бичядя ёв авирэ писхарьен, бутыр одолэндыр, кай исыс
англыдыр; и прэ адалэндэ ёнэ кэрдэ адя жэ. 37 Тэдэ ёв бичядя кэ ёнэ пэскирэ чявэс
и пхэндя: "Кэ миро чяво ёнэ отлыджянапэ патывалэс”. 38 Нэ, кэдэ гавитка бутярнэ
удыкхнэ чявэс, пхэндлэ ек екхэскэ: "Ада хуласкиро чяво, савэскэ рэсэлапэ сари пхув;
явэн, умараса лэс и закэдаса лэскиро миштыпэн!” 39 И, кэдэ ёнэ ухтылдэ лэс,
вычюрдынэ лэс виноградникостыр и умардэ. 40 Адякэ, кэдэ явэла
виноградникоскиро хулай, со ёв кэрла адалэ гавитконэ бутярнэнца?» 41 Ёнэ ракирэн
лэскэ: «Ёв мулякирла адалэн злыднен, а о винограднико здэла ваврэ гавитконэ
бутярьенгэ, кай лэна тэ отдэн лэскэ муря дрэ пэскиро сроко».
42 О Иисусо ракирэл лэнгэ: «Неужто тумэ ни кэдэ на гиндлэ дро Чиныбэна: "Бар,
савэстыр отпхэндлэпэ бутярья, кай чювэн о кхэра, ёв жэ кэрдяпэ главнонэ
вэнглытконэ барэса; адава кэрдя Рай, и сдиво дрэ амарэ якха? 43 Пал адава
ракирав тумэнгэ: Дэвлэскиро Царство явэла отлыно тумэндыр и явэла дыно
манушэнгэ, кай яндэн лэскирэ плоды. 44 И кон пэрла прэ адава бар, одова
розмарлапэ, а прэ конэстэ ёв пэрла, одолэс ростасавэла».
45 И, кэдэ о барыдыр рашая и фарисеи шундлэ Лэскирэ примеры, ёнэ полынэ, со Ёв
ракирэл пал лэндэ. 46 И ёнэ камнэ исыс тэ ухтылэл Лэс, нэ дарандынэ манушэндыр,
пал дова со ёнэ гинэнас Лэс палэ Припхэныбнарестэ.
22 И Иисусо палэ лыя тэ ракирэл лэнгэ примерэнца и пхэндя: 2 «Болыбнытко
Царство подджял прэ манушэстэ, царёстэ, кай кэрдя бьяв пэскирэ чявэскэ. 3 И
бичядя пэскирэ писхарьен, соб ёнэ тэ кхарэн манушэн про бьяв; и ёнэ на закамнэ тэ
явэн. 4 Палэ ёв бичядя авирэ писхарьен и пхэндя: "Пхэнэн манушэнгэ: "Эна, мэ скэдыём бьявитка скаминда, мирэ гурувэн и отчярадэ жывотнонэн зачиндлэ, и саро
скэрдо; явэн про бьяв”. 5 Нэ ёнэ адалэскэ годы шэро на дынэ и гынэ пэскэ, ек прэ
пэскири фэлда, авир - тэ залэлпэ бикнибнаса. 6 Ваврэ жэ, кэдэ ухтылдэ лэскирэ
писхарьен, кэрдэ сгало прэ лэндэ и умардэ лэн.
7 Нэ кэдэ царё ушундя пал дава, загыя дро холя и бичядя пэскирэ халадэн и
казнякирдя одолэн, савэ умардэ лэскирэ писхарьен, и схачькирдя лэнгиро форо. 8
Тэдэ ёв ракирэл пэскирэ писхарьенгэ: "Бьявитка скаминда скэдынэ, а одолэ, конэс
кхардям, на исыс мол. 9 Пал адава джян про дрома, кай сджянпэ трушылэса, и
сарэн, конэс латхэна, кхарэн пало бьявитка скаминда”. 10 И одолэ писхарья выгынэ
про дрома и скэдынэ сарэн, конэс латхнэ, и холямэн и лачен; и бьявитка скаминда
ячнэ пхэрдэ манушэнца.
11 Кэдэ жэ царё загыя тэ подыкхэл прэ манушэндэ, ёв удыкхья одой манушэс, кай на
исыс уридо дрэ бьявитко уриабэн, 12 и ракирэл лэскэ: "Друго, сыр ту загыян адарик
нанэ дрэ бьявитко уриабэн?” Ёв жэ штылёлас. 13 Тэдэ царё пхэндя пэскирэ
писхарьенгэ: "Спхандэн лэскэ о васта и о ґэра и вычюрдэн лэс аври дро тёмныма;
одой ёв лэла тэ ровэл и тэ счинэл о данда”.
14 Пал дова со бут, конэс кхардэ, нэ набут, конэс искэдынэ».
15 Тэдэ фарисеи гынэ и сракирдэпэ, сыр лэнгэ тэ ухтылэл лэс про лав. 16 И ёнэ
бичявэн пэскирэ сыклякирдэн кхэтанэ Иродианэнца и ракирэн: «Сыклякирибнарё,
амэ джинас, со Ту полэс дро чячипэн и сыклякирэс пало Дэвлытко дром чячипнаса, и
одолэскэ, сыр думинэн ваврэ мануша, ту годы шэро на дэс, пал дова со тукэ всаек,
саво штэто залэл мануш. 17 Пал дава пхэн амэнгэ, сыр ту думинэс, чебино тэ
плэскирэл о налого кесарёскэ78
, или нат?» 18 Нэ Иисусо полыя лэнгиро холямо
сракирибэн и пхэндя: «Палсо тумэ испытынэн ман, хоханэ? 19 Сыкавэн мангэ
ґасприн, савьяса плэскирэлпэ о налого». Ёнэ яндлэ лэскэ о динариё. 20 И Ёв
ракирэл лэнгэ: «Конэскиро ада муй и лав?» 21 Ёнэ ракирэн Лэскэ: «Кесарёскирэ».
Тэдэ Ёв ракирэл лэнгэ: «Адякэ и отдэн кисарёскиро кесарёскэ, а Дэвлэскиро
Дэвлэскэ». 22 Кэдэ ёнэ ушундлэ адава, удивиндлэпэ и ачькирдэ Лэс и угынэ одоцыр.
23 Дрэ одова дывэс подгынэ кэ Ёв саддукеи, кай ракирэн, со мулэ на уштэна дрэ
сэндоскиро дывэс, и спучнэ Лэстыр: 24 «Сыклякирибнарё, Моисеё пхэндя: "Если кон
мэрла, и лэстэр на явэла чявэн, то лэскиро пшал мэ лэл пэскэ лэскирэ ромня и мэ
бияндэл чявэн пэскирэ пшалэскэ”. 25 Эна, исыс амэндэ эфта пшала; перво, сыр
жениндяпэ, мыя бичяврэнгиро и ачядя пэскирэ ромня пэскирэ пшалэскэ. 26 Одова
жэ кэрдяпэ и второнэса, и тритонэса, и адя кэ эфтато. 27 Тэнчя, сыр мынэ сарэ, мыя
и джювлы. 28 Конэскэ жэ эфтаджинэндыр, кэдэ ёнэ уштэна мулэндыр дрэ
сэндоскиро дывэс, ей явэла ромняса? Ведь ей исыс пало ром пал сарэндэ».
29 О Иисусо пхэндя лэнгэ дро ответо: «Тумэ заблэндынэнпэ, и на джинэн ни о
Чиныбэна, ни Дэвлэскири зор. 30 Ведь кэдэ мулэ уштэна дрэ сэндоскиро дывэс, ёнэ
на лэна тэ женинэнпэ и тэ выджян пало ром, нэ ёнэ явэна сыр болыбнытка ангелы.
31 А со кэ сэндоскиро дывэс, кэдэ мулэ уштэна, то разве тумэ на гиндлэ, со Дэвэл
пхэндя тумэнгэ: 32 «Мэ сом Авраамоскиро Дэвэл, и Исаакоскиро Дэвэл, и
Иаковоскиро Дэвэл»? О Дэвэл нанэ мулэнгиро Дэвэл, нэ джидэнгиро». 33 И, кэдэ
мануша шундлэ адава, лэнгэ кэрдяпэ здиво прэ Лэскиро сыклякирибэн.
