57 А одолэ, кон лыя Иисусос, отлыджинэ Лэс ко барыдыр рашай Каиафа, савэстэ
скэдынэпэ лылваритка и патывалэ пхурэ. 58 О Пётро жэ джялас пал Лэстэ слядоса
дро дурипэн, кэ барыдырэ рашаскири грэда; и, кэдэ загыя, бэштя писхарьенца, соб
тэ дыкхэл о концо.
59 О барыдыр рашая и патывалэ пхурэ и саро Синедрионо родэнас хохано
допхэныбэн против Иисусостэ, соб тэ умарэн Лэс, 60 и на латхэнас; хотя и явэнас
бут мануша хоханэ допхэныбнэнца, нэ на латхнэ. Тэдэ явнэ дуй мануша, савэндэ
исыс хохано допхэныбэн, 61 и пхэндлэ: «Ёв ракирдя: "Мэ можынав тэ роспхагирав
Дэвлэскири кхангири и пало трин дывэс тэ чював ла палэ”». 62 И о барыдыр рашай
уштыя и пхэндя Лэскэ: «Тукэ нанэ со тэ пхэнэс прэ одова, со ёнэ ракирэн против
Тутэ?» 63 Нэ Иисусо штылёлас. И о барыдыр рашай пхэндя Лэскэ: «Мэ задав Тукэ
совэл прэ джидэ Дэвлэстэ, пхэн амэнгэ, Ту сан Христосо, Дэвлэскиро Чяво?» 64 О
Иисусо ракирэл лэскэ: «Ту пхэндян адава. И Мэ ракирав тумэнгэ: акана тумэ
удыкхэна Манушытконэ Чявэс, кай явэла бэшто пир право Зорьякиро вас и явэла
пирэ болыбнаскирэ облаки». 65 Тэдэ о барыдыр рашай розрискирдя прэ пэстэ
уриабэн и пхэндя: «Ёв обракирэл Дэвлэс! Палсо амэнгэ авир допхэныбэна? Эна,
кана тумэ шундлэ, сыр Ёв обракирэл Дэвлэс. 66 Со тумэ думинэн?” Ёнэ ракирэн
лэскэ дро ответо: "Ёв банго и мэ умарэн Лэс”. 67 Тэдэ ёнэ чюнгардэнас Лэскэ дро
муй и марэнас Лэс кулакэнца, а савэ-то дэнас Лэс ладошкаса пирэ чям 68 и ракирдэ:
«Эй, Ту, Христосо! Если ту Припхэныбнарё, пхэн амэнгэ, кон Тут дыя?»
69 О Пётро жэ исыс бэшто аври дрэ грэда. И подгыя кэ ёв ек писхарька и пхэндя: «И
ту санас Иисусоса, кай Галилеятыр!» 70 Нэ ёв отпхэндяпэ ангил лэндэ сарэндэ: «Мэ
на джинав, пал со ту ракирэс». 71 Кэдэ жэ ёв выгыя кэ порта, лэс додыкхья авир
писхарька и ракирэл одолэнгэ, кон исыс тэрдо одой: «И адава исыс Иисусоса, кай
Назаретостыр». 72 И ёв палэ отпхэндяпэ и совлахадя: «Мэ на джинав адалэ
манушэс.» 73 Прогыя набут времё и подгынэ одолэ, савэ исыс тэрдэ одой, и пхэндлэ
Пётроскэ: «Чячё и ту сан ек лэндыр, ведь и одова, сыр ту выракирэс лава, выдэл
тут». 74 Тэдэ ёв лыя тэ клининэл пэс и тэ совлахал: «Мэ на джинав адалэ манушэс».
И екхатыр жэ забаштя башно. 75 И Пётро срипирдя лава, кай пхэндя лэскэ Иисусо:
«Ангил одова, сыр пробагала башно, ту тринвар отпхэнэсапэ Мандыр». И ёв выгыя и
пхарэс зарундя.
27 Кэдэ жэ наячья утро, сарэ барыдыр рашая и патывалэ пхурэ
обсэндынэнас одова, сыр тэ умарэн Иисусос. 2 И спхандлэ Лэс, и улыджинэ и
отдынэ правителёскэ, савэс кхарнас Понтиё Пилато. 3 Кэдэ Иуда, кай придыя
Лэс, удыкхья, со Ёв исыс сэндякирдо про мэрибэн, приґалыя пэскири банг и
рискирдя трианда руповэ ґаспря барыдырэ рашангэ и патывалэ пхурэнгэ, 4 и
пхэндя: «Мэ кэрдём о грэхо, со придыём набанго рат». Ёнэ жэ пхэндлэ Лэскэ: «А
амэнгэ со? Дык кокоро!» 5 И тэдэ ёв чюрдыя руповэ ґаспря дрэ кхангири и выгыя
одоцыр, гыя и убладыя. 6 О барыдыр рашая лынэ руповэ ґаспря и пхэндлэ: «Нашты
пиро Законо тэ чювэл лэн дрэ кхангиритко казна, пал дова со ада тимин пало рат». 7
Кэдэ ёнэ поракирдэ, киндлэ прэ лэндэ пиритконэ бутярескири90
фэлда, соб тэ
гаравэл одой манушэн, кай явнэ ваврэ пхувьятыр. 8 Пал адава одоя фэлда и
накхарэлпэ ратэскирэ фэлдаса кэ адава дывэс. 9 Тэдэ сгыяпэ одова, со исыс
пхэндло через припхэныбнарестэ Иеремиястэ, кай ракирэл: «Ёнэ лынэ трианда
руповэ ґаспря - тимин пал Одолэстэ, Конэскэ ла чюдэ, Савэскэ чюдэ тимин
90 Пиритко бутярё (авторск.) - бутярё, кай кэрэл о пирья (о горшки). Израилёскирэ чявэ, 10 и дынэ лэн палэ пиритконэ бутярескири фэлда, сыр
припхэндя мангэ Яхва».
11 О Иисусо жэ исыс тэрдо ангилэ правителёстэ. И о правителё спучья Лэстыр: «Ту
сан Иудеякиро царё?» О Иисусо пхэндя лэскэ: «Ту адава ракирэс». 12 И кэдэ
баньчкирнас Лэс о барыдыр рашая и патывалэ пхурэ, Ёв ничи на ракирдя дро ответо.
13 Тэдэ Пилато ракирэл Лэскэ: «На шунэс, кицык допхэныбэна против Тутэ?» 14 И
Ёв на ответиндя лэскэ ни лав, ни паш, адя со о правителё дриван удивиндяпэ.
15 Про свэнко жэ о правителё обычно отмэкэлас манушэнгэ екхэ старибнарес, савэс
ёнэ камнэ. 16 Исыс тэдэ лэндэ джиндло старибнарё, савэс кхарнас Варрава. 17 Пал
адава, кэдэ ёнэ скэдынэпэ, Пилато пхэндя лэнгэ: «Конэс камэн, соб мэ тэ отмэкав
тумэнгэ: Варравас или Иисусос, адя накхардэ Христосос?» 18 Пал дова со ёв
джиндя, со ёнэ отдынэ Лэс завистятыр. 19 Кэдэ жэ ёв исыс бэшто прэ сэндаритко
штэто, лэскири ромны бичядя кэ ёв тэ пхэнэл: «На кэр ничи адалэ чячюнэ
манушэскэ, пал дова со дадывэс дро сунэ мэ бут мэнчинаваспэ пал Лэстэ». 20 Нэ о
барыдыр рашая и патывалэ пхурэ уракирдэ манушэн тэ мангэн тэ отмэкэл
Варравас, а Иисусос тэ умарэл. 21 Тэдэ о правителё спучья лэндыр: «Конэс дуендыр
камэн, соб мэ тэ отмэкав тумэнгэ?» Ёнэ пхэндлэ: «Варравас» 22 О Пилато ракирэл
лэнгэ: «Со жэ мангэ тэ кэрав Иисусоса, адя накхардэ Христососа?» Ёнэ сарэ
ракирэн лэскэ: «Казнякир Лэс про трушыл!» 23 О правителё жэ пхэндя: «Палсо?
Саво жэ фуипэн Ёв кэрдя?» Нэ ёнэ вся зоралыдыр дэнас годлы: «Про трушыл Лэс!»
24 О Пилато, кэдэ удыкхья, со ничи на поможынэл, нэ мануша вся бутыр ґадэнпэ,
лыя о паны и вымордя о васта ангил манушэндэ и пхэндя: «Мэ нанэ банго дрэ адалэ
манушэскиро рат; дыкхэн кокорэ». 25 И сарэ мануша пхэндлэ дро ответо: «Лэскиро
рат прэ амэндэ и прэ амарэ чявэндэ». 26 Тэдэ ёв отмэкья лэнгэ Варравас, а Иисусос
припхэндя тэ марэл чюкняса и тэ казнякирэл про трушыл.
27 Тэдэ правителёскирэ халадэ лынэ Иисусос дрэ сэндаритко дворцо и скэдынэ прэ
Лэстэ саро халадэнгиро полко. 28 И, кэдэ розуридэ Лэс, уридэ прэ Лэстэ лолы
псикитко, 29 скхудэ о венцо пусаибнытконэ чярьятыр и чюдэ Лэскэ про шэро, а дрэ
право вас дынэ тростниково кило и тэрдёнас ангил Лэстэ про чянга и ґаздэнас Лэс
про сабэн и ракирдэ: «Тэ явэс састо, Иудеякиро Царё!» 30 И чюнгардэнас дрэ Лэстэ
и, кэдэ лынэ о кило, марнас Лэс пиро шэро. 31 А тэнчя, сыр ёнэ пириячнэ тэ ґаздэл
Лэс про сабэн, слынэ Лэстыр лолы псикитко, и уридэ Лэс дрэ Лэскиро уриабэн, и
полыджинэ Лэс тэ казнякирэл про трушыл.
32 Кэдэ ёнэ выджянас, удыкхнэ екхэ манушэс Киренатыр, пиро лав Симоно; савэс
ёнэ зачюдэ тэ лыджял Лэскиро трушыл. 33 И кэдэ ёнэ явнэ про штэто, накхардо
Голгофа, одова исы Черепо, 34 дынэ Лэскэ тэ попьел шутлы лолы бравинта, дрэ
савьятэ исыс подчюдо киркипэн; и Ёв, кэдэ набут лыя дро муй, на закамья ла тэ
пьел. 35 Кэдэ жэ ёнэ примардэ Лэс гвозденца ко трушыл, лынэ тэ чюрдэн о жребиё
и тэ роскэрэн Лэскиро уриабэн. 36 И бэштнэ тэ ракхэн Лэс одой. 37 И прэ Лэскиро
шэро убладэ пхал, кай усыкадэ одова, дрэ со Лэс банькирдэ: «Ада Иисусо,
Иудеякиро Царё».
38 Тэдэ Лэса исыс примардэ ко трушыла дуй розмарибнарья: ек пир право строна
Лэстыр, а авир пир лево. 39 Одолэ жэ, кай проджянас мамуй Лэстэ, кошэнас Лэс,
качинэнас шэрэнца 40 и ракирдэ: «Эй, Ту, Кай скэдэсаспэ тэ пхагирэл кхангири и
пало трин дывэс тэ чювэл ла палэ, зрак Кокоро Пэс! Если Ту сан Дэвлэскиро Чяво,
сджя трушылэстыр!» 41 Адякэ жэ и о барыдыр рашая лылваритконэнца и патывалэ
пхурэнца ґадэнас Лэс про сабэн и ракирдэ: 42 «Авирэн зракхэлас, а Кокоро Пэс тэ
зракхэл на можынэл! Если Ёв Израилёскиро Царё, мэ исджял акана трушылэстыр, и амэ патяса дрэ Лэстэ! 43 Ёв патялас дрэ Дэвлэстэ; мэ зракхэл Лэс акана, если Ёв
Лэскэ дрого; пал дова со Ёв пхэндя: "Мэ сом Дэвлэскиро Чяво”». 44 Адя жэ и о
розмарибнарья, кай исыс примардэ Лэса ко трушыла, кошэнас Лэс.
45 И шовтонэ кунятыр прэ сари одоя пхув змэкьяпэ тёмныма и рикирдяпэ кэ еньято
кунь. 46 А дрэ еньято кунь Иисусо зоралэс загодлыя: «Эли, Эли, лама савахфани?» -
одова исы «Дэвла Миро, Дэвла Миро, соскэ Ту ачядян Ман?» 47 Кон-то одолэндыр,
савэ исыс тэрдэ одой, кэдэ адава ушундлэ, лынэ тэ ракирэн: «Ёв кхарэл Ильяс». 48
И ек лэндыр екхатыр жэ наштя, лыя э губка, прокинькирдя ла шутлэ лолэ бравинтаса
и начюдя ла прэ тростниково кило и дыя Лэскэ тэ пьел. 49 Авирэ жэ ракирдэ: «Ачяв
Лэс! Дыкхаса, сыр явэла Илья91
тэ зракхэл Лэс». [Авир жэ, кэдэ ухтылдя о копьё,
промардя Лэскэ о боко, и гынэ рата и паны.] 50 О Иисусо жэ палэ зоралэс загодлыя и
отмэкья о духо.
51 И эна, кхангирьякиро улув92
роспутрадыя про дуй чясти, упрастыр тэлэ; и
пхув затринцкирдяпэ; и о бэрги пхарадынэ. 52 И рипирибнытка ґаныка откэрдэпэ; и
бут святонэ манушэнгирэ телы, кай мынэ, ґаздынэпэ, 53 и выгынэ пэскирэ
гробэндыр, сыр Ёв уштыя мулэндыр, и явнэ дрэ свято форо и сыкадынэ бутэ
манушэнгэ. 54 Кэдэ шэлэнгиро баро рай и одолэ, кай лэса ракхэнас Иисусос,
удыкхнэ сыр тринцкирдёла пхув и саро, со кэрдяпэ, дриван сдарандынэ и ракирдэ:
«Чячё ада исыс о Чяво Дэвлэскиро».
55 И одой исыс адя жэ бут джювля и дыкхэнас дурипнастыр, савэ джянас пал
Иисусостэ слядоса Галилеятыр и служынэнас Лэскэ, 56 машкир лэндэ исыс Мария
Магдалина и Мария, Ияковоскири и Иосияскири дай, и Зеведеёскирэ чявэнгири дай.
57 Кэдэ жэ наячья бывэль, явья ек барвало мануш Аримафеятыр, пиро лав Иосифо,
саво адя жэ исыс Иисусоскиро сыклякирдо. 58 Ёв гыя ко Пилато и помангья лэстыр
Иисусоскиро тело. Тэдэ Пилато припхэндя тэ отдэл лэскэ о тело. 59 И кэдэ Иосифо
лыя о тело, то обрискирдя лэс жужэ лёноса 60 и чюдя Лэс дрэ пэскири нэви
рипирибнытко ґанык, кай исыс вымарды дрэ бэрга; и закэрдя о входо дрэ ґанык барэ
барэса и угыя. 61 Одой жэ исыс Мария Магдалина и авир Мария, кай исыс бэштэ
ангилэ ґанык.
62 Прэ авир дывэс, ада исыс суббота, скэдынэпэ о барыдыр рашая и фарисеи ангил
Пилатостэ 63 и ракирдэ: «Рай, амэ срипирдям, со адава хохано, инкэ кэдэ исыс
джидо, ракирдя: "Через трин дывэс Мэ уштава мулэндыр”. 64 Пал адава припхэн тэ
ракхэл ґанык кэ трито дывэс, соб Лэскирэ сыклякирдэ тэ на явэн и, кэдэ вычёрна
Лэскиро тело, тэ на пхэнэн манушэнгэ: "Ёв уштыя мулэндыр!”; тэдэ одова хохаибэн
явэла фуялыдыр первонэстыр». 65 О Пилато пхэндя лэнгэ: «Эна тумэнгэ халадэ;
джян и ракхэн, сыр джинэн». 66 Ёнэ гынэ и чюдэ пашэ ґанык халадэн и чюдэ э
печять про бар.
28 Кэдэ жэ прогыя суббота, дрэ перво куркэскиро дывэс, явнэ кай свэто
Мария Магдалина и авир Мария тэ подыкхэн ґанык.
2 И эна, зоралэс затринцкирдяпэ пхув, пал дова со Раскиро Ангело сгыя
болыбнастыр, подгыя и отвалиндя о бар, и бэштя прэ лэстэ. 3 Пэстыр ёв исыс
сыр блескавица, а лэскиро уриабэн исыс парно сыр ив. 4 О халадэ э трашатыр
ангил лэстэ затринцкирдэпэ и кэрдэпэ сыр мулэ.
5 О ангело жэ пхэндя джювленгэ дро ответо: «На трашан; мэ джином, со тумэ
91 Прэ арамейско чиб лав Илья ракирэлпэ Эли, со адя жэ значинэ "Миро Дэвла”.
92 Улув/улува (пурано лав) - "шатрытко полого; ширма. (адай) занавеса, занавеска”.родэн Иисусос, Савэс казнякирдэ про трушыл. 6 Лэс адай нанэ. Ёв уштыя
мулэндыр, сыр и пхэндя. Пододжян, подыкхэн о штэто, кай Рай исыс пашло. 7
И джян сыгыдыр и пхэнэн Лэскирэ сыклякирдэнгэ, со Ёв уштыя мулэндыр, и
эна, джял англыдыр тумэндыр дрэ Галилея; одой тумэ удыкхэна Лэс”. Эна, со мангэ
чебинэ исыс тумэнгэ тэ пхэнав».
8 И ёнэ сыго выгынэ рипирибнытконэ ґаныкатыр дараса и барэ лошаса и
нашнэ тэ роспхэнэн пал адава Лэскирэ сыклякирдэнгэ. 9 Кэдэ жэ ёнэ джянас
тэ роспхэнэн Лэскирэ сыклякирдэнгэ, и эна, Иисусо встретиндя лэн и пхэндя:
«Явэн састэ!» И ёнэ подгынэ кэ Ёв и ухтылдэпэ пал Лэскирэ ґэра и бандинэ
Лэскэ. 10 Тэдэ Иисусо ракирэл лэнгэ: «На трашан! Джян, пхэнэн Мирэ
пшалэнгэ, соб ёнэ тэ джян дрэ Галилея и одой ёнэ удыкхэна Ман».
11 Кэдэ жэ ёнэ джянас, савэ-то халадэндыр явнэ дро форо и роспхэндлэ
барыдырэ рашангэ пал саро, со кэрдяпэ. 12 И ёнэ скэдынэпэ патывалэ
пхурэнца, обракирдэ машкир пэстэ, и дынэ халадэнгэ бут ґасталя, 13 и
пхэндлэ: «Пхэнэн: "Лэскирэ сыклякирдэ явнэ раты и чёрдэ Лэс, кэдэ амэ самас
сутэ”. 14 И если о шуныбэн пал дава доджяла ко правителё, амэ уракираса
лэс и зракхаса тумэн бидатыр». 15 И ёнэ лынэ ґасталя и кэрдэ адя, сыр исыс
сыклякирдэ; и о шуныбэн пал адава розгыяпэ машкир иудеендэ кэ адава
дывэс.
16 Дэшуек жэ сыклякирдэ гынэ дрэ Галилея прэ бэрга, карик лэнгэ напхэндя
Иисусо, 17 и, кэдэ удыкхнэ Лэс, бандинэ Лэскэ, а авирэ на патяндынэ, со ада
исыс Ёв. 18 И Иисусо подгыя кэ ёнэ и пхэндя лэнгэ: «Мангэ исыс дыны сари
власть про болыбэн и прэ пхув. 19 Пал адава джян и сыклякирэн манушэн
сарэ пхувьендыр и болэн лэн дро лав Дадэскиро, Чявэскиро и Святонэ
Духоскиро. 20 И сыклякирэн лэн тэ кэрэн саро, со Мэ напхэндём тумэнгэ; и
эна, Мэ тумэнца дрэ сарэ дывэса кэ свэтоскиро концо».
Словарё
Яхва/Яхве (еврейсконэ чибатыр הוהי ЙХВХ) — Дэвлэскиро лав, саво Ёв (Дэвэл)
пхэндя Моисеёскэ, Пэскирэ искэдынэ припхэныбнарескэ, кэдэ о народо Израилё исыс
улыджино халадэнца дро Египто. Сыр евреи выракирнас Дэвлэскиро лав (савэс
зачинэнас штарэ буквэнца ЙХВХ) дро пураныпэн — акана ни конэскэ нанэ джиндло,
нэ прилыно тэ гинэл, со - Яхва/Яхве, кай значинэл: «Ёв джидо Дэвэл», «Ёв дэл
джиипэн», «Ёв дэл тэ ячел [сарэ джидэскэ]». Ях — ада учиндло упрыдыр
усыкадэстыр Дэвлэскиро лав. Учиндло лав можно тэ латхэл дро Свята Чиныбэна прэ
греческо чиб — αλληλουϊά "аллелуйа”, кай исыс лыно еврейсконэ чибатыр — היוללה
"халлелу-Ях”, со пирилыджялпэ "Шарэн [Дэвлэс] Ях(ос)”.
Иисусо — прэ еврейско чиб Йешуа, ада учиндло лав - лавэстыр Йехошуа, саво
значинэ: Йехова — зракхибэн.
Припхэныбнарё (авторск.) — свято мануш, кай припхэнэл Дэвлэскирэ Духостыр, и
ракирэл Дэвлэскири воля манушэнгэ. Дро пураныпэн исыс манушэндэ дрэ бари
патыв. О припхэныбнарья припхэнэнас пало войны, начювэнас манушэн прэ чячюно
дром, соб ёнэ тэ порисён ко Дэвэл и тэ на отоджян Лэскирэ Напхэныбнэндыр, улэнас лэн дрэ бида. Ёнэ припхэндлэ, со явэла Мессия, шэла бэрша англыдыр Лэскирэ
бияндыпнастыр и инкэ бут авирэ лэнгирэ припхэныбэна сгынэпэ прэ Иисусостэ
Христосостэ. Дрэ Свято Чиныбэн ракирэлпэ, со припхэныбнарья на припхэнэнас
пэстыр, нэ искэдэнаспэ Дэвлэса, сыр Дэвлэскирэ волякирэ бичядэ.
О барыдыр рашая — рашая, кай залэнас дрэ кхангири баро штэто.
Лылваритко (или Законоскиро сыклякирибнарё) — лылварэ мануша иудеенгирэ
народостыр, кай куч джинэнас Свята Чиныбэна, пиричинэнас лэн, соб тэ зракхэл и
сыклякирнас дро синагоги манушэн пало Законо и Напхэныбэна. Лэнгирэ мануша
исыс сэндарьенца дро Упрыдыр сэндо (Синедрионо).
Христосо — о титуло греческонэ чибатыр, саво пирилыджинэ лав дро лав еврейсконэ
чибатыр Машиах, со значинэ: Мессия; Помакхно.
Помакхно — Помахнэса накхарэнас дрэ пурано Израилё царен и рашан. Кэдэ дро
Израилё чювэнас про троно нэвэ царёс или рашас тэ служынэл дрэ кхангири, лэс
помакхэнас кучкхандунэ елеёса (елеё - пуранэ греческонэ чибатыр ἔλαιον "оливково
ксил”). Иисусо — Мессия (Помакхно), царё Давидоскирэ родостыр, пал савэстэ
припхэнэнас дрэ Пурано Завето, пал дова со прэ Лэстэ сгынэпэ сарэ припхэныбэна.
Кучкхандуно ксил — э мирра/смирна (греческонэ чибатыр μύρρα).
Иоанно Болдарё (авторск.) — искэдыно Дэвлэса мануш, припхэныбнарё, кай
лыджялас Дэвлытко лав, прикхарэлас манушэн англыдыр тэ приґалён пэскирэ грэхи и
тэдэ болэлас лэн панеса прэ рэка Иордано, соб тэ явэн отмэкнэ лэнгирэ грэхи, адякэ
соб мануша тэ явэн готова тэ прилэн Иисусоскиро Лошало Лав пал Болыбнытко
Царство.
Шукхи пхув — шукхэ, бипанескирэ штэты, дрэ савэндэ бут пяско и на барьён чярья.
(пустыня).
Фарисеи (чибатыр иврит םי שורפ ם , перушим, прушим, со пирилыджялпэ: "одолэ, савэ
отгынэ”) — иудеи, кай пририкирнаспэ ко Свята Чиныбэна и Моисеёскирэ
причиныбэна; лэнгирэ мануша исыс сэндарьенца дро Упрыдыр сэндо (Синедрионо) и
барыдырэ рашанца дро синагоги.
Саддукеи (чибатыр иврит םיקודצ ם , цадоким, накхардэ пиро лав Садоко - евр.чиб
Цадоко, со пирилыджялпэ «Ёв (Дэвэл) сыкадя Пэс чячюнэса») — иудеи, кай сарэ
строгимаса пририкирнаспэ ко Свята Чиныбэна и полэнас Моисеёскиро Законо лав дро
лав, отпхэнэнаспэ сарэ кхангиритконэ свэнкэндыр, кай на исыс причиндлэ дрэ
Библия. Лэнгирэ мануша исыс сэндарьенца дро Упрыдыр сэндо (Синедрионо).
Сатано (чибатыр иврит ן טש ן , сатан — «противнико») — Дэвлэскиро вэрго, кай
слыджял манушэн ко грэхо.
О кхудя (неологизмо, лыно балтийсконэ ромэнгирэ Библиятыр) – кхуденца ухтылэн
мачен (о сети).
Синагога (греческонэ чибатыр συναγωγή, «скэдыпэн»; иврейско чиб תסנכ תיב ת , бейт
кнесет — «скэдыпнаскиро кхэр». О кхэр, кай скэдэнаспэ евреи тэ гинэл Свята
Чиныбэна, тэ мангэлпэ Дэвлэскэ, тэ лыджял Дэвлытко лав и кэрнас сарэ авирэ
причиныбэна Моисеёскирэ Законостыр.
Чёнытко насвалыпэн – "лунатизмо”.
Сыклякирдо (авторск.) — одова, кон сыклёл (ученико) или адякэ жэ одова, кон
прилыя конэскиро-либо сыклякирибэн, патябэн (ученико, последователё).
Трушало (жаждущё) ко Дэвлытко чячипэн - родэл Дэвлытко чячипэн сыр о паны.
Тэлэмамылытко чяроро (авторск.) — о чяроро, кай чювэлпэ тэлэ мамылы (подсвечнико).
Дэвлэскирэ Напхэныбэна — дэш Напхэныбэна, кай Дэвэл начиндя про бар и дыя
припхэныбнарескэ Моисеёскэ прэ бэрга Синаё, со дрэ шукхи пхув.
"1) Мэ сом Яхва, тыро Дэвэл, мэ на явэн тутэ ваврэ дэвэла, кроме Мандэ. 2) На кэр
пэскэ чиндлэ дэвлэс и ни саво чиндло муй, одолэскиро, со про болыбэн упрэ, со прэ
пхув тэлэ или дро паны тэлыдыр пхувьятыр; на бандёв лэнгэ и на служын лэнгэ, пал
дова со Мэ сом Яхва, тыро Дэвэл, сом Дэвэл зэвлындытко, Саво каринэл чявэн палэ
дадэнгиро грэхо кэ трито и штарто поколениё, кай на камэн Ман, и кэрэл миштыпэн
ко бара поколения одолэнгэ, кон камэл Ман и дживэл пир Мирэ Напхэныбэна. 3) На
ракир Яхваскиро лав, тырэ Дэвлэскиро, ивьятунэс, пал дова со Яхва на ачькирла, соб
тэ на покаринэл, одолэс, кон ракирэл Лэскиро лав ивьятунэс. 4) Рипир дывэс суббота,
соб тэ святинэл лэс; шов дывэс кэр буты и кэр сарэ пэскирэ рэнды; а эфтато дывэс —
Яхваскири суббота, тырэ Дэвлэскири: на кэр ни саво рэндо ни ту, ни тыро чяво, ни
тыри чяй, ни тыро писхарё, ни тыри писхарька, ни тыро ското, ни мануш, кай явья
ваврэ пхувьятыр дрэ тыро кхэр. Пал дова со пало шов дывэс Яхва кэрдя болыбэн и
пхув, о морё и саро, со дрэ лэндэ, а дрэ эфтато дывэс отхынёлас; пал адава Яхва
благословиндя дывэс суббота и кэрдя лэс святонэса. 5) Чюв патыв прэ тырэ дадэстэ и
тырэ датэ, соб тэ явэн длэнгыдыр тырэ дывэса прэ пхув, сави Яхва, тыро Дэвэл, дэл
тукэ. 6) На умар. 7) Ромны на испарув пэскирэ ромэскэ и ром на испарув пэскирэ
ромнякэ. 8) На чёр. 9) На дэ хохано допхэныбэн против тырэ ближнёнэ манушэстэ.
10) Тукэ нашты тэ камэс тырэ ближнёнэ манушэскиро кхэр; тукэ нашты тэ камэс тырэ
ближнёнэ манушэскирэ ромня, ни лэскирэ писхарёс, ни лэскирэ писхарька, ни
лэскирэ гурувэс, ни лэскирэ ослос, ни со одолэстыр, со исын тырэ ближнёнэ
манушэстэ”.
О Упрыдыр сэндо — Синедрионо (греческонэ чибатыр συνεδριον).
Геенна (чибатыр иврит םנהג ,םונהג Ге Хинном "Эномоскири маль”, греч. чиб Γέεννα) —
о штэто пало форо Иерусалимо, кай вычюрдэнас и схачкирнас сари блата и о мусоро
форостыр, мулэ животнонэн и казнякирдэ розмарибнарьенгирэ трупы, савэ на исыс
